Sukab dan Corynebacterium diphtheriae

Dimuat di esai Edisi Sunday, 24 December 2017
Oleh - Dibaca: 9 kali -


Listrasi Karya DIDIE SW.

Mentari emang belon nongol, tapi selewat Subuh suarenye penggorengan di warung Mang Ayat bener-bener meriah, ampe ngebangunin Sukab nyang molor di pojokan. Walow sempet mendusin, Sukab masing ngeringkel kayak ebi garing. Ampe terang tane, orang-orang nyang sarapan nasi uduk kagak tau ade manusiah di pojokan, soalnye kepale Sukab masup ke dalemnya sarung kayak kura-kura. Lantaran ntu sarung rada kumuh, orang kagak bisa bedain ape ntu orang ape cuman onggokan.

Ngedadak kedengeran suarenye orang bersin. Nyang pade sarapan brenti ngunyah.

”Apaan tuh?”

Kliatan sarung kumuh di pojokan kembang kempis kayak ubur-ubur.

”Waduh, makhluk apaan tuh Mang?”

”Makhluk apaan? Ya makhluk Sukab, nggak bangun-bangun dari semalem tuh.”

Kepale Sukab nyang tampangnye rebek banget muncul, matenye merem.

”Minum ….”

Menarik juga dibaca:   Nagabumi II Kitab 7 #126 Para Pemberontak

Yati, ponakan Mang Ayat, cepet aje nyaut.

”Ah, kolokan aje tuh, biar nggak bayar.”

Rohayah deketin lantes tempelin punggung tangannye ke leher Sukab.

”Alamak! Kayak Gunung Agung mau meleduk!”

Orang-orang nyang lagi nyarap ngliatin, sembari ngunyah maupun brenti kagak bise nerusin makan.

”Ente demam Kab?” Rohayah pegangin pergelangan tangan kayak dokter ngitungin denyut nadi.

”Ho’oh,” kedengeran Sukab ngejawab lemes. Sarungnye begerak-gerak kendiri padahal ntu awaknye ngegigil.

Rohayah nerusin dokter-dokterannya.

”Tenggorokan ente sakit?”

”Ho’oh.”

”Hmm, jelas suare ente ude serak gitu. Napas pegimane?”

Cepet banget napas Sukab, nyang nggak bise omong ape-ape.

”Leher ente bengkak, mane idung beringus gitu,” ujar ntu dokter dadakan, ”kali-kali ente kepatil dipteri nih.”

Ngedenger kate ’dipteri’,
langsun orang pade buyar. Mang Ayet ame Yati mungsang-mangsing atinye warung ngedadak kosong.

Menarik juga dibaca:   Membaca Cerpen Jakob Soemardjo

”Mpok, ente ntu tukang pel, biarpun ude jadi bos tukang-tukang pel di gedung tinggi, tetep aje palingan taunye obat pel,” Yati mereret, ”kenape mesti bilangin Sukab kene dipteri? Ente bukannye dokter kan?”

Rohayah cepet-cepet ngebela diri.

”Ane ngomong ntu ade dasarnye, pan ane selempang Sukab bener-bener kene dipteri. Awalnye emang kayak pilek doang, pegimane kalow mangkin kentel lan campur dare!”

”Ih, ngeri bener!”

”Itu die! Nular lagi …”

”Nular? Pantes pade kabur!”

”Nah, ape sale ane selempang Sukab kene dipteri, mane kerjaan die bukannye nyang bise cuci tangan pake alkohol saben menitnye.”

Dari dalem sarung Sukab denger semue, tapi kepalenye kagak bise mikir, cangkul ame pengkinye aje doi ude lupe tarok di mane.

Abang Dosen masup warung mau nyarap.

Menarik juga dibaca:   Nagabumi III #9 Dari Champa ke An Nam

”Tumben sepi Mang, ari gini misi penu kan biasanye.”

”Pade lari Bang, ngeri ketularan dipterinye Sukab.”

”Huss! Sembarangan aje! Emang mane Sukab?”

Di pojok onggokan sarung begerak-gerak kayak kerang siap direbus, Abang Dosen nyang tau ntu pasti Sukab cepet begerak.

”Pinjem senter,” katenye. Begitu dapet, sarung disibak en keliatan kepale Sukab.

”Buka mulut Kab.”

Sukab buka mulut. Abang Dosen nyenterin.

”Ooooh, bukan difteri, ini demam berat. Kalow difteri ade lapisan tipis abu-abu nyang nutupin tenggorokan ame amandel,” ujar Abang Dosen nyang lulus kedokteran sebelon pindah filsafat, ”tapi semue baraya musti suntik vaksin ye? Sekarang. Buruan gih pigi puskesmas. Bawa Si Sukab.”

”Semue?” Mang Ayat bengong.

”Yo-i. Biarin ane nyang jaga warung,” kate Abang Dosen, sembari nyambung dalem ati, ”bener-bener bahaye percaye isyu nggak bener.” ***

TERIMA KASIH Anda telah mengunjungi halaman Sukab dan Corynebacterium diphtheriae oleh yang terbit pada Sunday, 24 December 2017 di esai. Jika konten hanya berbentuk gambar, silakan klik pada gambar untuk memperbesar agar teks tulisan bisa jelas terbaca. Anda bisa berkontribusi dengan mengetik ulang konten yang masih berbentuk gambar ke dalam bentuk teks dan kirimkan ke email sastracerpen@gmail.com untuk dimuat disini. Anda bisa juga berdonasi tanpa uang untuk memperpanjang website ini agar terus online dan kontennya terus bertambah dengan mengunjungi iklan partner yang muncul di website ini. Jika ingin meng-copy konten di website ini untuk web/blog, bahan pelajaran, penulisan buku atau karya ilmiah lainnya, kami persilakan dengan syarat menyebutkan www.sastracerpen.com sebagai sumbernya. Terima kasih, selamat membaca dan semoga bermanfaat.
KLIK (X) 2x Untuk Menutup

Selamat Membaca

Sukab dan Corynebacterium diphtheriae

×
KLIK (X) 2x Untuk Menutup

Selamat Membaca

Sukab dan Corynebacterium diphtheriae

×