Si Palui: Di Bawah Ranjang

Dimuat di banjarmasinpost-sipalui Edisi Friday, 18 May 2018
Oleh - Dibaca: 8 kali -


BULAN nang ditunggu-tunggu ulih umat Islam, terutama nang mangaku baiman wan bartakwa kapada Allah SWT adalah bulan Ramadhan atau jar urang banua adalah bulan puasa. Satahun 12 bulan, sabulan bapuasa sadang haja kalu. Ibarat mutur parlu istirahat masinnya, jadi bamandak dahulu bajalan karana masin panas banar sudah.

Minggu partama di bulan puasa naya, Palui memang asa lucut manjalanakan ibadah puasa. Bahanu baduduk, bahanu baungut, bahanu malihat tv, barabahan di kamar tapi tatap parut lapar.

”Ubui abahnya naya, pina galisah banar karana puasa pang?” sambat nang bini.

“Aku tarang tarus haja umanya ai, kada sanggup jadi urang fakir, nang hari ni makan, malamnya balum tentu kawa makan? Karana baduit kadada, pasti galurukan parut,” sahut Palui.

“Nitulah makna puasa supaya kita kawa besabar, kawa merasakan pandaritaan fakir miskin, nang bahanu makan inya, bahanu balapar karana kadada baduit manukar baras atau nasi, lain hal kita kawa, kanyang tarus karana ada haja baduit,” bini Palui bijak.

Menarik juga dibaca:   Si Palui: Bulat Jua

“Titikan aku banyu mata umanya ai, kaganangan…,” ucap Palui.

“Kaganangan napa, mantan pacarkah?” bini Palui lakas panimburuan wayahni.

“Jangan tarlalu panimburuan, sadang-sadang haja. Aku kaganangan saudara kita nang kurang beruntung bahanu makan, bahanu lapar, karana keadaan, Alhamdulillah kita kawa makan talu kali sahari, pas di bulan puasa naya kita kawa merasakan pandaritaan mereka, kaya apa rasanya parut lapar tentu kada nyaman kalu?” Palui manyambung pamanderan bininya.

“Iya kaya nitu, nyaman didangar, jadi kada usah galisah banar karana parut lapar, jangan ha pian bakuriak parutku lapar,” sahut nang bini manyinggung.

“Ayuha umanya ai, jakanya ikam ka pasar batutukar pabukaan masakan wan wadai,” suruh Palui.

Kada lawas bini Palui barangkat ka pasar tatinggal Palui sorangan di rumah. Karana parut sudah galurukan akhirnya Palui mambuka kincing di dapur, dilihatnya masih ada nasi bakas sahur wan iwaknya. ”Dimakan kada?” suara hati Palui.

Menarik juga dibaca:   Si Palui: Pakulih Bini

Akhirnya Palui makan, dibawanya ka bawah ranjang mamakannya. Habisakan ha kena bapadah liku kalaparan wan bini ikam? bisikan batin Palui. Kiap-kiap Palui makan sorangan, hari panas banar di luar rumah. Iya haja sudah nah.

Sampai bulik salat Dzuhur bajamaah kanapa Palui kada talihat batang hidungnya di masjid, biasa te ada haja muncul. Datangan Garbus wan Tulamak ka rumah Palui mailangi kalau si Palui garing jadi kada turun salat Dzuhur di masjid.

”Ui Lui, napa maka kada ka masjid ikam?” Garbus sambil mangatuk rumah Palui.

“Uh Garbus kah wan Tulamak, aku lapar banar nah?” Palui sambil betapihan bakas masih guring mambukai buhannya.

Menarik juga dibaca:   Si Palui: Korupsi Waktu

“Umai Lui guring hajakah puasa naya?” takun Tulamak.

Sakalinya buhannya ada malihat piring bakas makan di bawah ranjang.

”Nah napa ni piring ada di bawah ranjang, gangannya masih basah?” ujar Garbus sambil malihatakan ka Palui.

“Astaghfirullah buhannya ai, aku kada tahan puasa, jam 11.30 tadi makan, padahal jaka puasa ha, iya kada buhannya?” Palui mangaku manyasal makan sapiring sudah, tapi tadi bapadah kalaparan?

“Iya haja Lui ai, kalakuan ikam mantang bini kadada di rumah, eh sakalinya makan gancang kena bapadah puasa?” huhulut Tulamak, wan Garbus habang muha Palui.

Han jarku, patuh kanyang tarus tiap hari, akhirnya kada sanggup bapuasa. Sadar Lui lah, umur kadada babau! (aan maulana/penulis matan kuta dudul, HSS)

Artikel ini telah tayang di banjarmasinpost.co.id dengan judul Si Palui: Di Bawah Ranjang, http://banjarmasin.tribunnews.com/2018/05/18/si-palui-di-bawah-ranjang?page=all.

Editor: Didik Trio

TERIMA KASIH Anda telah mengunjungi halaman Si Palui: Di Bawah Ranjang oleh yang terbit pada Friday, 18 May 2018 di banjarmasinpost-sipalui. Jika konten hanya berbentuk gambar, silakan klik pada gambar untuk memperbesar agar teks tulisan bisa jelas terbaca. Anda bisa berkontribusi dengan mengetik ulang konten yang masih berbentuk gambar ke dalam bentuk teks dan kirimkan ke email sastracerpen@gmail.com untuk dimuat disini. Anda bisa juga berdonasi tanpa uang untuk memperpanjang website ini agar terus online dan kontennya terus bertambah dengan mengunjungi iklan partner yang muncul di website ini. Jika ingin meng-copy konten di website ini untuk web/blog, bahan pelajaran, penulisan buku atau karya ilmiah lainnya, kami persilakan dengan syarat menyebutkan www.sastracerpen.com sebagai sumbernya. Terima kasih, selamat membaca dan semoga bermanfaat.
KLIK (X) 2x Untuk Menutup

Selamat Membaca

Si Palui: Di Bawah Ranjang

×
KLIK (X) 2x Untuk Menutup

Selamat Membaca

Si Palui: Di Bawah Ranjang

×