Si Palui: Korupsi Waktu

Dimuat di banjarmasinpost-sipalui Edisi Monday, 07 May 2018
Oleh - Dibaca: 29 kali -


NGARAN jadi guru, si Palui sabanarnya sudah tahu haja bahwa peraturan di sakulahan harus hadir saminggu 37,5 jam, tapi inya pina biasa-biasa haja, tatap bulik sungsung pada guru lainnya. Macam-macam alasannya.

”Uh guru piket, aku handak parmisi salat Dzuhur ka masjid,” ujar Palui ka guru piket.

“Inggih Pak Palui ai, ulun catat nah,” sahut guru piket.

Hampir saban hari kecuali hari Jumahat haja Palui kada izin salat Dzuhur, karana hari Jumahat nitu bulikan jam 11.30.

“Palui ni bila minta izin salat Dzuhur, bulik salajur ka rumah,” sahut guru nang lain.

“Iya kaya nitulah sudah kalakuannya, pak kapala sakulah (kepsek) tahu banar karakter Palui,” celutuk guru Hudari nang mangajar IPS.

Karana banyak keluhan guru kapada kepsek maka dilaksanakan rapat lengkap saluruh guru wan buhan staf tata usaha.

”Ulun sebagai kepsek rasa kada nyaman nah, akhir-akhir ni kahadiran guru di sakulahan kita disorot masyarakat, karana ada satu atau dua urang nang rajin bolos jam kerja,” ujar kepsek mambuka pander. Pada waktu rapat.

Menarik juga dibaca:   Si Palui: Bulat Jua

“Jadi bila ada tindakan buhan atasan ka guru-guru nang barsalah tanggung sorangan, jangan manyalahakan kepsek atau wakil kepsek,” tagas sidin habang muha.

“Kalau ulun pak kepsek ai, minta izin salat Dzuhur jam tangah hari,” sahut Palui.

“Bulih banar izin ka masjid salat Dzuhur bajamaah, tapi babulik kembali ka sakulahan, ni ikam Lui ai, kabanyakan bulik salajur kada datang lagi ka sakulahan, kasihan murid nang balajar jam 7,8 kada balajar Bahasa Inggris,” sambat sidin tarus tarang.

“Kaputusannya apa pak kepsek rapat kita saat ni?” takun Garbus paman sakulahan.

“Kaputusannya parhatikan jam kahadiran buhan guru maupun buhan staf tata usaha, tarmasuk paman sakulahan, jangan samaunya bulik kada bapadah. Datang paling lambat jam 7.30, bulik satangah talu kamarian!” sidin manjalasakan banar.

Sampai akhirnya ka talinga wakil kapala kantur bahwa Palui katuju bulik balum waktunya. Labar am sidin sidak ka sakulahan Palui. Kira-kira jam satangah satu habis salat Dzuhur dikumpul sidin guru-guru wan pagawai tata usaha.

Menarik juga dibaca:   Si Palui: Di Bawah Ranjang

”Berataan kita rapat saat ni jua!,” ujar wakil kapala kantur nang tarkenal badisiplin nitu.

Imbah dikumpul pucat kepsek wan guru lainnya, karana saikung kada talihat di kumpulan rapat nitu. Dipanggil sidin satu parsatu absen hadir, sakalinya Palui nang kadada lagi batang hidungnya, alias bulik salajur ka rumah.

”Napa Palui naya nang kadada lagi, nyata banar iya kada?” sahut kepsek pina pucat muha sidin.

“Sudah tahu kalu aturan disiplin buhan pian berataan?” ujar wakil kapala kantur mahing baucap.

‘Tahu pak ai,” sahut buhan guru tadarau.

“Kita di kepegawaian ni ada ngarannya korupsi duit, wan ada ngarannya korupsi waktu. Korupsi duit nitu kawa diganti wan duit jua, tapi kalau korupsi waktu ya kadada gantiannya, lima manit atau sapuluh manit waktu dikorupsi, barlalu kada kawa diganti-ganti, hilang sudah sampai hari kiamat. Jadi kaya apa buhan pian mampartanggungjawabakannya kena di hadapan Tuhan bila korupsi waktu nitu, aku lah kada bartanggungjawab! Karana sudah kusampaiakan. Jadi supaya jangan baurusan di akhirat kena soal waktu kerja ni, makanya parhatikan waktu kahadiran buhan pian di sakulahan atau di kanturkah, sama haja,” jalas sidin panjang lebar.

Menarik juga dibaca:   Si Palui: Pakulih Bini

Kada lawas muncul Palui.

”Uh Paluikah, napa maka hanyar muncul?” takun sidin.

Palui pucat muhanya. ”Ulun maumpani itik wan ayam pak ai,”sahut Palui manunduk.

“Ikam Lui ai korupsi waktu! Bahayanya angkat lagi pada korupsi duit tahu kada ikam, karana kalau korupsi waktu kada kawa dibulikakan lagi waktunya, kalau duit kawa digantii,” sambat wakil kapala kantur habang muha. Ampihlah, jangan lagi lah!” sangit sidin.

“Inggih pak ai,” Palui manunduk supan inya. Mandam kepsek wan saluruh guru sarta buhan staf tata usaha.

Han apa jarku Lui, kajadian suka bulik tarus habis sidin sidak ka sakulahan kada bapadah.
(aan maulana/penulis matan kuta dudul, HSS)

Editor: Didik Trio

TERIMA KASIH Anda telah mengunjungi halaman Si Palui: Korupsi Waktu oleh yang terbit pada Monday, 07 May 2018 di banjarmasinpost-sipalui. Jika konten hanya berbentuk gambar, silakan klik pada gambar untuk memperbesar agar teks tulisan bisa jelas terbaca. Anda bisa berkontribusi dengan mengetik ulang konten yang masih berbentuk gambar ke dalam bentuk teks dan kirimkan ke email [email protected] untuk dimuat disini. Anda bisa juga berdonasi tanpa uang untuk memperpanjang website ini agar terus online dan kontennya terus bertambah dengan mengunjungi iklan partner yang muncul di website ini. Jika ingin meng-copy konten di website ini untuk web/blog, bahan pelajaran, penulisan buku atau karya ilmiah lainnya, kami persilakan dengan syarat menyebutkan www.sastracerpen.com sebagai sumbernya. Terima kasih, selamat membaca dan semoga bermanfaat.
KLIK (X) 2x Untuk Menutup

Selamat Membaca

Si Palui: Korupsi Waktu

×
KLIK (X) 2x Untuk Menutup

Selamat Membaca

Si Palui: Korupsi Waktu

×